Министерот за здравство Азир Алиу објави дека преку платформата „Отворен кабинет“ секој граѓанин ќе може да закаже директна средба со него во петоците и да му ги пренесе своите проблеми.

- Вистинската реформа почнува тогаш кога институцијата престанува да зборува сама со себе – и почнува да го слуша народот со отворен ум и јасна намера за промена. Затоа, денес не претставуваме само нова веб-страница, туку создаваме институција што слуша и реагира. Преку алатката „Отворен кабинет“, секој граѓанин може директно да закаже средба со мене, секој петок, без бариери и без бирократија. Лице в лице, човечки разговор – со почит, одговорност и подготвеност за конкретни решенија, објави министерот.

Алиу додава дека првите 15 термини веќе се резервирани и вети дека ќе ја почитува оваа алатка со тоа што секој петок ќе биде присутен на закажаните средби.

- Ова е доказ дека граѓаните имаат што да кажат, и конечно имаат каде да бидат слушнати. Јас сум тука да ги слушнам. Оваа иницијатива не е само услуга. Таа е став. Став дека здравството не смее да биде затворен систем, туку жив организам што комуницира, систем што вклучува и реагира навреме, додаде тој.