ПОЖАРОТ ВО ВАЛАНДОВСКО СТАВЕН ПОД КОНТРОЛА - над 60 луѓе од пред пет часот утрово „се борат“ со огнот
Пожарот кој избувна вчера попладне околу 14 часот во непосредна близина на валандовско Грчиште и се закануваше да ги зафати првите куќи во селото, според најновите информации е ставен под контрола.
Според информацијата од заменик директорот на ЈП „Македонски шуми“, Кире Михаилов, објавена на неговиот фејсбук профил, по долгата и напорна ноќ, пожарот во валандовско е ставен под контрола!
- Повеќе од 60 луѓе од 5 часот наутро се на линијата на огнот и до овој момент може да кажеме дека и покрај тоа што беше голема, целата линија на огнот е покриена.
Допрва ќе станува жешко во текот на денот и нашите екипи остануваат овде за да видат што денот и природата ќе ни донесе.
Огромна благодарност до колегите од подружниците Валандово, Гевгелија и Струмица при ЈП "Македонски Шуми" кои со 26 луѓе од рано наутро се на терен во Валандово - напиша Михаилов на Фејсбук.
Тој изрази огромна благодарност до против пожарните единици од Валандово, Струмица, Гевгелија, Радовиш и Кавадарци кои направија натчовечки напори во справувањето со оваа огнена стихија.
Исто така и до доброволното противпожарно друштво од Валандово за целиот ангажман околу овој пожар.
- Огромна благодарност до колегите од шумската полициска станица Валандово кои дадоа огормен допринос во справувањето.
Исто така, морам да кажам дека и општинските власти на Валандово беа на ниво на својата задача и максимално се вклучија во санирањето на оваа непогода која се закануваше да биде од огромни размери.
На крајот, најважното, огромна благодарност до граѓаните и општоодговорните компании кој се вклучија да помогнат во гаснењето на овој пожар кој се закануваше да биде огромен.
Остануваме сите заеднички да бидеме на ниво на задачите и да се испречиме пред било кој и каков предизвик ќе ни донесат несериозноста на граѓаните и непредвидливоста на природата.
Благодарност до сите оние кои јавно ни даваа беспрекорна поддршка и доверба - напомна уште еднаш заменик директорот.
Инаку, според утринската информација од Центарот за управување со кризи (ЦУК), покрај пожарот меѓу селата Грчиште и Марвинци, во овој регион има пожар и во Општина Богданци, на потегот од браната Паљурци до Богданци, каде гори ниска вегетација и грмушки.
Слично
Поврзани вести
