Вчера повеќе опозициски портали беа недостапни за читателите по што се јавиле сомнежи дека станува збор за организиран хакерски напад, но за оваа „теорија“ засега нема докази бидејќи објаснувањето најверојатно е многу поедноставно. 

Портали како Фокус, Нова ТВ, Либертас, СДК, Локално, ПлусИнфо, МКД како и на електронските изданија на дневните весници „Утрински весник“, „Дневник“ и „Вечер“ се хостирани кај еден провајдер, а тоа е Унет од каде пак, објаснуваат дека се соочиле со вообичаен технички проблем кој е надминат.

- Проблемот се случил синоќа додека сообраќајот на порталите бил мал затоа и не се активирале заштитните механизми. Се работи за линковски проблем и некако не станува збор за сајбер-напад. Работиме на проблемот и се надеваме дека за кратко време ќе биде решен. Потенцирам дека не станува збор за никаков напад – изјави Антони Пешев, директор на Унет за Мета.