Премиерот Заев бара целата снимка објавена од јутјуб да биде објавена со цел да му се обели образот.

Денеска беше одложено рочиштето од судењето за случајот „Поткуп“ во кој обвинет е премиерот и истото е презакажано за 29 јануари, следната година.

Причина за одложувањето е тоа што предметот е во Апелацискиот суд Скопје кој треба да одлужува по жалбата на Заев околу користењето на посебните истражни мерки (ПИМ) како доказ во судската постапка.

Одбраната на премиерот бара снимката од ПИ-мерките да не се користи како доказ, бидејќи делови од неа беа јавно објавени на видео-сервисот „Јутјуб“.

„Сакам снимката да биде јавно обелоденета со деловите каде што е пресечена“, истакна Заев и додаде дека му е важно да го зачува образот.

Според обвинителството, Заев, во својство на службено лице, градоначалник на Струмица, од струмички бизнисмен побарал поткуп од 163.924 евра, односно по 2 евра за еден квадратен метар градежно земјиште во Струмица, за кое бизнисменот бил заинтересиран да го приватизира. Во обвинението пишува дека една половина од парите требале да бидат за Заев, а другата за изградба на црква во Струмица.

Премиерот тврди дека цело време бил свесен дека лицето се обидува да го намести и поднесе кривична пријава против бизнисменот, но до денеска од неа нема ништо.