Планинскиот центар Пониква ќе биде подготвен за прием на повредените од трагедијата во Кочани до крајот на неделата и ќе функционира како рехабилитациски центар во кој рехабилитацијата ќе се одвива во групи и ќе трае по две недели – беше истакнато на денешната владина прес-конференција.

Пресот го одржаа владината портпаролка Дарка Митева, д-р Катерина Мирчовска – новата директорка на Општата болница во Кочани, и д-р Гордана Георгиева – членка на работната група за евалуација на повредените.

– Сакам да ја информирам јавноста дека одморалиштето во Пониква технички ќе биде готово со минимални корекции до крајот на оваа недела, а оперативниот план за рехабилитација е веќе во завршна фаза. Засега е заземен став дека рехабилитацијата ќе се врши по групи, во циклуси од по две недели – нагласи Митева.

Таа посочи дека Владата останува доследна на транспарентниот пристап и дека телефонската линија што беше отворена за погодените веќе дава резултати.

– До овој момент, Канцеларијата на Претседателот на Владата оствари контакт со 109 лица кои ги споделија своите предлози и барања. Најголемиот дел од нив се однесуваат на здравствени дополнувања и неопходни потреби – рече портпаролката Митева.

Таа ги охрабри сите кои се чувствуваат засегнати да продолжат да се обраќаат и да го споделуваат своето искуство, уверувајќи дека секој глас е важен и слушнат.

– Овие чекори за нас не се само административна постапка. Ова е наша обврска – истакна Митева. – Да го вратиме достоинството на секој човек, без политика, без сензационализам, со вистина и со грижа.