Грција најавува мерки за намалување на гужвите на копнените гранични премини, во период кога се очекува засилен сообраќај поради летната туристичка сезона.

Во фокусот е граничниот премин Евзони, кој е еден од најкористените премини за граѓаните од Македонија што патуваат кон Солун, Халкидики и другите туристички места во северна Грција.

Заменик-министерот за внатрешни работи на Грција, надлежен за регионите Македонија и Тракија, Константинос Гиулекас, најави дека се разгледуваат привремени решенија со кои би се олеснило преминувањето на границата.

Една од мерките е поставување модуларни контролни пунктови на Евзони, со што една сообраќајна лента би се проширила во две. Целта е да се овозможи побрза обработка на патниците и да се намали времето на чекање.

Гиулекас посочи дека просторот на преминот има ограничена флексибилност и дека трајното решение зависи од модернизацијата на инфраструктурата, која се спроведува во фази.

До целосното уредување на преминот, грчките власти ќе користат привремени технички решенија и дополнителна организација на контролите, особено во деновите кога се очекуваат најголеми колони.

Во однос на биометриските проверки, грчкиот функционер истакна дека европските правила дозволуваат привремено и делумно суспендирање на нивната примена во периоди на зголемен сообраќај.

Таквата можност, според грчките власти, веќе се користи кога има потреба да се обезбеди нормален проток на патници и возила.