„ПОД КОЈ КАМЕН БЕШЕ СОКРИЕН ВЕНКО ФИЛИПЧЕ ВО СЕПТЕМВРИ 2023 ГОДИНА, ЗОШТО ТОГАШ НЕ КРЕНА ГЛАС“ - адвокатот Митровски за грешката на СДСМ за Кривичниот законик
Адвокатот Јанаки Митровски преку социјалната мрежа Фејсбук прашува каде бил Венко Филипче во септември 2023 година кога тогашната власт го донесе Кривичниот законик, а тој беше член на владејачката СДСМ.
„Секако да се запраша човек каде беше Венко Филипче во Септември 2023та година? Под кој камен беше сокриен? Во состојба на хибернација ли беше? Онеме ли па некој го спречи да крене глас тогаш од позиција на член на владеачка партија кога тоа ќе вредеше многу повеќе, отколку сега како претседател на грогираниот СДСМ? Не сметаше ли тогаш дека измените во Кривичниот Законик кои значат амнестија за државните криминалци е грешка?!“, пишува Митровски.
А, пред неколку дена, како што е познато, новиот лидер на СДСМ, Венко Филипче на брифинг со новинарите во Скопје рече дека згрешиле со измените во Кривичниот законик, коишто доведоа до намалување или застарување на казните на голем број функционери обвинети за злоупотреби. По бројните критики во јавноста и меѓународните институции, Филипче вели дека е време да се донесе нов Кривичен закон кој ќе ги исправи направените грешки.
„Треба да бидеме чесни и да признаеме дека згрешивме со измените во Кривичниот законик. Но, истовремено имаме соработка со меѓународните институции со коишто се донесени 20-тина закони, поддржани и од Венцијанската комисија и сметам дека треба да продолжиме по патот на имплементација на реформите во судството, со поддршка на меѓународната заедница“, рече Филипче.
Тој апелираше до ВМРО-ДПМНЕ заедно да донесат нов Кривичен закон, за кој вели дека е изготвен и треба да биде ставен на јавна расправа. Станува збор за закон кој почнал да се изготвува во 2017 година, во време кога министерка за правда беше Рената Дескоска од СДСМ.
„Апелирам Владата да го стави на јавна расправа. Тој нов Кривичен закон е направен во координација со меѓународните институции, по терк на Кривичниот закон во Германија и сметам дека што поскоро треба да биде ставен на јавна расправа, да го разгледаат експерти, да го кажат своето мислење и заедно со консензус да донесеме нов, како што доликува. Не е доволно да кажеме дека сме згрешиле што сме донеле таков закон - еве одиме чекор понатаму таа грешка да ја исправиме на овој начин“, вели првиот човек на опозициската СДСМ.
За направената грешка рече. „Не треба да затвориме очи и уши и да не ги слушнеме забелешките на граѓаните. Затоа предлагам да продолжиме на патот на соработа со меѓународните институции кои не поддржуваат и кои вложиле многу за да се реформира судството“, вели Филипче.
Слично
Поврзани вести
