Во собраниската Комисија за финансирање и буџет денеска започна расправата за предлог-буџетот за 2015 година. Според вицепремиерот и министер за финансии, Зоран Ставрески, овој буџет ќе овозможи капитални инвестиции и зголемување на платите и пензиите. Истовремено, продолжува рестриктивната буџетска политика. „Приходите се проектирани врз база на ниско ниво на даночни стапки во земјата, што е важно бидејќи со тоа даваме директна поддршка на стопанството и правиме Македонија да остане интересна за странските инвеститори“, рече Ставрески. Според предлогот, приходите се проектирани на  163.280 милијарди, расходите на 181.777 милијарди денари, а буџетскиот дефицит е 3,5 проценти од БДП. Ставрески нагласува дека ова е разумно ниво имајќи ги предвид бројот и големината на проектите што ќе се финансираат и економскиот раст што ќе го овозможи тоа.

Од овие пари, за капитални инвестиции предвидени се 21.209 милијарди денари, а дополнително значаен износ е предвиден и во програмите на Јавното претпријатие за патишта преку кое се реализираат автопатите од Миладиновци-Штип и Охрид- Кичево, како и програмите на претпријатијата во државна сопственост од енергетската област кои годишно просечно изнесуваат 100 милиони евра.

„Оваа политика во изминатиот период даде добри резултати. Градежништвото остварува двоцифрени стапки на раст. Ја повлекува и индустријата, односно голем број мали и средни претпријатија кои се вклучени во работните ангажмани на градежните фирми и на тој начин се повлекува целосно растот на македонската економија“, вели Ставрески.

Растот за следната година е проектиран на четири проценти, а инфлацијата ќе остане на ниско ниво до 2 проценти.

Опоцизијата, поради своето отсуство од Собранието, годинава нема да учествува во расправите за државната каса. Сепак, од СДСМ со соопштение го коментираа предлогот, тврдејќи дека се работи за „еден од најгломазните и неразвојни буџети досега“, при што најголем дел ќе одат за плати и пензии, незначително ќе се зголемат средствата за капитални инвестиции, а ќе се намалат парите за субвенции.

„Колку е лоша состојбата со буџетот покажува намалувањето на еден од најголемите адути на власта за фалби пред избори, а тоа се субвенциите. За 2015 година, власта ги намалува парите за субвенции за над 2 милиона евра“, соопшти СДСМ.

Опозицијата тврди дека власта се потпира на нагазување на казнената политика кон граѓаните и стопанството, како еден од главните извори на прибирање пари во буџетот за догодина.