Во својот дом во Панчево, денеска почина Борче Величковски, претседател на Националниот совет на Македонската заедница во Србија.

Величковски е роден на 29 август 1973 година во Крива Паланка, Република Македонија. Со неговата мајка од Македонија доаѓаат во Јабука, Панчево и таму продолжува да живее. Оженет е за Адела со која имаат три ќерки. Неговото семејство живее во Панчево.

Борче Величковски е претседател на Националниот совет на Македонската заедница во Србија во четири мандати 2010-2014, 2014-2018, 2018-2022 и 2022-2026 година, избран на електорски собранија.

Националниот совет е законска форма на културна автономија на националните малцинства во артикулацијата на нивните интереси пред институциите на власта на Србија и законска форма на месна самоуправа во заштита и афирмација на етничкиот, јазичниот, културниот и историскиот идентитет на националните малцинства во Србија.

Националниот совет на Македонската заедница во Србија е формиран на 26 декември 2004 година, во првиот мандат до 2010 година претседател е Јован Радевски. Од 2004-2010 година, Борче Величковски е секретар на Националниот совет на Македонската заедница во Србија.

Борче Величковски е дипломиран менаџер по медиуми. Неговата работна кариера бележи 10 години работно искуство во стопанството, 10 години работно искуство во културата, пишаните и електронските медиуми и активизам во заштитата на човековите и малцинските права и слободи.