Петар П. (58) од хрватскиот град Сплит починал вчера попладнето на планината Голем Кораб при планинарење со планинарско друштво, информира полицијата.

Во Центарот за информации и команда - Тетово, во 18.20 часот е пријавено дека на планинар од Хрватска му се слошило и паднал во безсознание, во местото викано Кобилино поле, во атар на Маврови Анови, на Голем Кораб.

Групата броела околу 20-ина планинари, државјани на Република Хрватска и сите од планинарско друштво од Сплит.

Бидејќи местото каде што планинарот се онесвестил било прилично оддалечено од ПС Стрезимир, а поради непристапен терен со возило не може да се стаса до местото, веднаш е повикан хелихоптер на МВР.

Од полицијата со хелихоптер го пренеле планинарот во Градската општа болница 8-ми Септември во Скопје, но лекарите само констатирале смрт. 

По наредба на Јавен обвинител на телото на починатиот денес ќе биде извршена обдукција.