На социјалните мрежи се шири нов повик за учество на денешните протести против уставните измени кои за разлика од претходните денови ќе започнат во 12 часот. Протестот е закажан вообичаено пред Собранието на Република Македонија.

„Ние Македонците имаме сопствена држава еднаш на 1000 години и нема да дозволиме сега кога имаме сопствена држава сами да извршиме самоубиство и да прифатиме некаква промена на името. Немаме друга опција - или крај за нашиот Македонски народ или ќе останеме да постоиме како Македонци. Ве повикуваме сите вас да ни се придружите и да дадете се од себе во битката за одбрана на нашето име Македонија. Ова е битка на се или ништо! Ова е битка во која Мајка Македонија гледа и плаче и бара помош. Да знаеме Македонија е се што имаме“, велат од Бојкотирам.

Засега од опозициската ВМРО-ДПМНЕ нема официјален став за одржување на нови протести и демонстрации, освен што пратениците на оваа партија нема да учествуваат на утрешната собраниска дебата за уставните измени. Во објавата на движењето „Бојкотирам уставни“ измени повикани се членови и симпатизери на сите партии.

„Над Македонија лебди еден дух - духот на Македонија! Македонци од сите политички партии - од ВМРО, од СДСМ, од Левица, од сите политички партии обединете се под знамето на Македонија!!! Македонија е нашата татковина и нашето име е Македонија!!! Или ќе опстанеме како народ, или ние Македонците ќе изумреме и ќе исчезнеме. Токму затоа по секоја цена мора да го одбраниме нашето име“ соопштуваат од Бојкотирам.

Повикот на Бојкотирам уставни измени го споделуваат и членови и симпатизери на ВМРО-ДПМНЕ, но официјална поддршка од раководството или членовите на Извршниот комитет засега нема.