За проектот „Тополификација на општините во Пелагонија“ беше информиран вицепремиерот за економски прашања Владимир Пешевски за време на работната посета на РЕК Битола. - Станува збор за проект вреден меѓу 70 и 80 милиони евра за кој физибилити студијата е изработена, во тек е тендерска постапка за проектирање и очекуваме од средината или крајот на следната година да се влезе во конкретна реализација на она што ќе биде видливо за граѓаните, а тоа е изградба на топловод од РЕК Битола до градот Битола, изјави Пешевски. Тој додаде дека  покрај производството на електрична енергија ќе  има и производство на топлинска енергија со многу поголем коефициент на полезно дејство и при тоа ќе се добиваат над 200 мегавати топлинска енергија и  истакна дека освен за домовите на граѓаните тополоводот ќе биде искористен и од земјоделците за производство на производи од оранжериски тип.