Претседателот на државата Стево Пендаровски изјави дека ќе се продолжи важноста на возачките дозволи за 10 месеци.

„Можам да ве информирам дека сите пратенички групи безмалку сите дадоа поддршка, денеска во 17 или 18 часот е закажана седница на парламентот колку што јас знам, на која ќе се донесе измена на законот за возачки дозволи со која ќе се продолжи рокот за важење во внатрешноста на државата. Мислам дека во законот ќе стои 10 месеци плус, треба да се сменат во тие 10 следни месеци околу 270 илјади возачки дозволи и тоа е изводливо“, изјави Пендаровски.

Возачките дозволи ќе важат до крајот на 2024 година. Со 89 гласа ЗА, пратениците ја изгласаа потребата од промени во законот за безбедност во сообраќајот. На итната седница која ја свика претседателот на собранието Јован Митрески прва точка беше потребата од носење на Законот за безбедност во сообраќајот со што важноста на возачките дозволи со старото име на државата ќе биде до 31 декември. Овој закон сега треба да го помине филтерот на комисијата за одбрана и законодавно-правната комисија. Се очекува овие измени да бидат изгласани денеска попладне.