Претседателот Стево Пендаровски го одбил барањето за помилување на поранешната шефица на Специјалното јавно обвинителство Катица Јанева. 

При тоа, од Кабинетот на претседателот на државата посочуваат дека негативно мислење дала и Комисијата за помилување. 

- Претседателот го одби барањето за помилување на поранешната специјална обвинителка Катица Јанева. Исто така и Комисијата за помилување, која е советодавно работно тело во Кабинетот на претседателот, даде негативно мислење по барањето, наведуваат од таму.

Покрај Јанева, претходно во медиумите беше објавени дека и поранешниот судија и претседател на Кривичниот суд Скопје, Владимир Панчевски, како и бизнисменот Сеад Кочан побарале помилување од Пендаровски додека ги издржуваат затворските казни.

Јанева и Панчевски годинава по првпат, додека Кочан по вторпат се обиделе преку шефот на државата да го скратат својот престој во затвор каде што издржуваат повеќегодишни казни.

Поранешната специјална обвинителка е осудена на седумгодишна затворска казна поради злоупотреба на службената положба и овластување како специјална јавна обвинителка во аферата „Рекет“.