Банките во Федерацијата Босна и Херцеговина во првите три квартали оствариле рекордна нето добивка од 432,7 милиони конвертибилни марки (околу 216 милиони евра - н.з.), покажуваат податоците на Агенцијата за банкарство на Федерацијата Босна и Херцеговина.

Споредено со истиот период лани, добивката е поголема за 137,6 милиони КМ или за 46,6 отсто. Вкупните приходи на банките во периодот јануари-септември изнесуваат 1,16 милијарди KM и се повисоки за 166,3 милиони KM или 16,7 отсто во однос на деветте месеци од минатата година, додека вкупните расходи изнесуваат 717,95 милиони KM и се повисоки за 17,3 милиони KM. или 2,5 отсто во однос на трите квартали од 2022 година.

Рекордните приходи на банките дојдоа на бранот на поволен монетарен и финансиски ветер што дојде со растот на каматите во изминатиот период. Податоците за поединечни ставки што ги презентираше Јасмин Махмузиќ, директор на Агенцијата за банкарство на ФБиХ, покажаа дека банките не морале ни да се мачат, бидејќи парите „дојдоа сами“.

- Зголемување на каматата на средствата до 30 дена и орочените средства над 30 дена што банките од ФБиХ ги чуваат кај банките во странство за 62 милиони марки поради зголемувањето на меѓубанкарските каматни стапки на пазарот на пари на ЕУ, односно зголемувањето на еурибор, според Индикатор.ба.

- Приходите од каматите на кредитите се зголемени за 58 милиони марки, поради зголемувањето на кредитното портфолио на банките во Федерацијата Босна и Херцеговина и конверзијата на променлива каматна стапка во фиксна.

- Провизиите за банкарски услуги се зголемени за 18 милиони марки.

- Зголемување на приходите на банките во износ од пет милиони марки поради воведување провизија на средствата од задолжителната резерва на Централната банка на Босна и Херцеговина.

- Намалување на трошоците во износ од 16 милиони марки поради укинувањето на негативниот надоместок за средства над задолжителната резерва во Централната банка на Босна и Херцеговина.

- Раст на приходите од камати поради вложувања во домашни и странски хартии од вредност во износ од седум милиони марки.

Сето ова резултираше со зголемување на добивката на банките во Федерацијата БиХ на 432,7 милиони КМ за девет месеци.