Договорот со руски Газпром е потпишан. Македонија со крак ќе се приклучи кон Јужен тек. Дали гасот ќе дојде од  Србија или Бугарија останува да одлучат Русите. Договорот во Москва денеска го потпишаа вицепремиерот, Зоран Ставрески и рускиот министер за енергетика Александар Новак. Како што најавија владините претставници, вклучувањето на Македонија во Јужен тек е од стратешко значење за земјата со што Македонија станува дел од меѓународните транспортни коридори и се обезбедува зголемена сигурност во сферата на енергетиката за двете земји. Како што истакна премиерот Никола Груевски кој ја предводеше делегацијата во русија, денешниот е само еден од низата договори кои треба да се потпишат за гасификација. „ Ова е исклучително значаен проект за нас затоа што со Јужен тек практично на долг рок се гарантира енергетската стабилност на Република Македонија, се обезбедуваат нови количини на гас, што ќе направат и проектот за внатрешна инфраструктура за пренос на гас во Македонија да добие една поголема смисла“, изјави претходно Груевски. Потпишувањето беше потврдено и од руските претставници. Според планот, откако ќе се потврди исплатливоста на проектот,  руски Газпром и македонската компанија ќе формираат заедничка компанија, со по 50% сопственост, но ќе дозволат вклучување и на други акционери. „Јужен поток“ е од стратешко значење за енергетката безбедност во Европа и според првичните планови треба да биде пуштен во употреба до крајот на 2015 година.  Проектот Јужен поток чини 16 милијарди евра. Гасоводот ќе минува низ Бугарија, Србија, Унгарија, Словенија и Италија, а останатите држави ќе бидат приклучени преку краците. Гасоводот Јужен поток со капацитет од 63 милијарди кубни метри годишно ќе обезбедува греење, топла вода и снабдување со струја за околу 30 милиони домаќинства во Европа.