Кризата што доведе до колапс на три регионални американски банки во последните недели е во голема мера завршена по решавањето на проблемот со First Republic банката, според Џејми Дајмон, извршен директор на JPMorgan Chase.

JPMorgan се појави како победник на викенд аукцијата за First Republic, откако регулаторите одлучија дека истече времето за решение за приватниот сектор. Федералната корпорација за осигурување на депозити ја заплени банката, а њујоршкиот JPMorgan рано во понеделникот објави дека ги презема речиси сите депозити на First Republic и поголемиот дел од нејзиниот имот.

„Има толку банки кои беа вака во офсајд“, им рече Дајмон на аналитичарите на нивниот повик веднаш по објавувањето на договорот.

„Можеби има уште една помала, но ова во голем дел ги решава сите. Овој дел од кризата е завршен“, рече Џејми Дајмон.

По ненадејниот колапс на Silicon Valley Bank и Signature Bank во март, инвеститорите ги казнија другите заемодавачи кои имаа слични карактеристики како SVB. Компаниите со најголем процент на неосигурени депозити и загуби на билансот беа намногу под лупа.

Мартовските превирања го разоткрија лошото управување на некои средни банки кои во суштина се обложија дека каматните стапки нема да се зголемат; кога стапките се зголемија, банките беа фатени во „офсајд“ со нереализирани загуби на обврзници на нивните биланси.

Но, вбризгувањето на депозитите од 30 милијарди долари во First Republic минатиот месец купи време за индустријата, дозволувајќи им на средните банки да ги пријават резултатите од првиот квартал во последните недели кои во многу случаи покажаа стабилизирање на депозитите. Тоа ги олесни стравувањата на инвеститорите дека многу кредитори наскоро ќе пропаднат.

Акциите на регионалните банки, вклучувајќи ги PacWest и Citizens Financial, паднаа во претпазарното тргување. Инвеститорите остануваат изложени на ризици создадени од зголемувањето на каматните стапки на Федералните резерви и нивното влијание врз средствата, вклучително и недвижен имот, додаде Дајмон.

(Извор: CNBC)