Главниот град на Саудиска Арабија, Ријад, стана клучна излезна точка за супербогатите поединци и високи директори на големи компании кои останаа блокирани во регионот на Персискиот Залив и бараат безбеден начин да го напуштат, објави порталот „Семафор“.

Во изминатите години, градови како Абу Даби и Дубаи важeа за омилени дестинации на богатата елита, благодарение на сончевата клима, поволниот даночен режим и перцепцијата за висока безбедност.

Но, викендов таа слика беше нарушена по иранските ракетни и дрон-напади врз овие градови, како и врз Катар и Бахреин, што ги натера оние кои можат да си дозволат – да побараат итен излез од регионот.

Ријад – последната отворена врата

Аеродромот во Ријад е меѓу ретките во регионот што сè уште функционираат без прекин. Поради тоа, богатите семејства и деловни луѓе од други земји во Заливот патуваат со часови за да стигнат до саудиската престолнина – било за комерцијални летови, било за приватни авиони.

Според извори запознаени со ситуацијата, приватни безбедносни компании резервирале голем број теренски возила за десетчасовен транспорт од Дубаи до Ријад. По пристигнувањето, се организираат летови со приватни авиони кон Европа и други безбедни дестинации.

Меѓу евакуираните има високи раководители на глобални финансиски корпорации, како и богати поединци кои во регионот престојувале поради бизнис или туризам.

Лет од 350.000 долари

Наглиот пораст на побарувачката доведе до драстичен скок на цените за изнајмување приватни авиони и транспорт.

– Саудиска Арабија е единствената реална опција за оние што сакаат веднаш да го напуштат регионот – изјави Амир Наран, извршен директор на брокерската куќа за приватни авиони „Вимана Прајват“.

Според него, лет со приватен авион од Ријад до европска дестинација сега чини и до 350.000 долари.

Безбедносните компании првично се обиделе да го искористат Оман како алтернативна рута, но таа можност пропаднала по напад врз пристаниште и танкер за нафта во земјата, што дополнително го ограничило изборот.

– Ни се обратија семејства, поединци и корпорации кои сакаат да го напуштат регионот – од безбедносни или деловни причини – изјави Иан Мекол од британската компанија „Алма Риск“.

Зошто токму Ријад?

Дополнителна причина за засиленото движење кон Ријад е олеснетиот визен режим. Граѓаните на многу земји можат да добијат виза по пристигнувањето, додека порано процедурата траеше со недели.

Градот досега ги избегна најголем дел од иранските напади, што му овозможи да го задржи отворен воздушниот простор.

Причините зошто Иран не ја таргетира значително Саудиска Арабија засега остануваат нејасни. Престолонаследникот Мохамед бин Салман претходно изјави дека нема да дозволи територијата или воздушниот простор на кралството да се користат за напади врз Иран, настојувајќи да избегне директно вклучување во конфликтот.

Пресврт во перцепцијата

Интересно е што Ријад сега се доживува како релативно безбедна дестинација – што претставува пресврт во однос на минатото.

Во претходните години воздушниот простор над градот често беше затворан поради ракетни напади од јеменската милиција Хути. Дополнително, строгите религиозни правила и терористичките напади од почетокот на 2000-тите ѝ дадоа на Саудиска Арабија репутација на нестабилна земја.

Сепак, во актуелната криза, токму Ријад се наметна како најбезбедната транзитна точка за елитата што сака брзо да го напушти Блискиот Исток.