Утре Полска преку својот парламент ќе биде следната земја која ќе го ратификува пристапниот Протокол за прием на Македонија како 30-та членка на НАТО.

Гласањето во полскиот парламент е ставено на дневен ред на седницата наутро, а ова го потврди полскиот амбасадор во Скопје, Војчех Тицињски, на дипломатската дискусија на тема „Патот до Брисел“.

– Ова не е коинциденција, зошто ова се случува токму во овие денови, и сакавме да го поканиме претседателот на Собранието Талат Џафери да присуствува на овој настан, но за жал тој е во странство во момент, но на гласањето ќе присуствува заменик-преседателот Весел Мемеди, рече Тицињски.

Досега Протоколот потпишан во Брисел го ратификуваа националните парламенти на Данска, Литванија, Романија, Хрватска, Црна Гора, Бугарија, Словенија, Албанија и Грција.

Потребни се уште ратификациите на 19 земји за Македонија да стане официјален член на Алијансата.