Бујар Османи, министерот за надворешни работи, на денешниот брифинг со медиумите по Минхенската безбедносна конференција изјави дека Петри Муслиу, синот на аналитичарот Алберт Муслиу, е испратен како генерален конзул во Чикаго, но не на негов предлог.

- Петрит Муслиу е предложен во 2019, пред да дојдам јас како министер за надворешни работи, но јас го упатив. Тој е дипломиран правник и магистар по меѓународно право, изјави Османи.

Муслиу бил предложен на 20 декември 2019, а работно бил ангажиран како програмски менаџер и советник во Владата.

Османи додаде дека одлуката да биде испратен во Чикаго не била обелоденета јавно, затоа што се чекал агреман од земјата во која се испраќа како дипломат.

- Според закон, седницата е доверлива, не можам да коментирам дали имало само расправа, но не и одлука. Се додека не се добие агреман од земјата каде што се упатува, таа не се објавува во јавноста. Што доколку се одбие агреманот? Ќе се спори името јавно и ќе се наруши интегритетот на предлогот. Тоа е така секаде, рече министерот.