Новиот вицепремиер задолжен за европски прашања Бујар Османи на денешната средба со амбасадорката Ренате Коблер очекува да продолжи пријателскиот однос на Австрија и поддршката за европските интеграции, како и за посветеноста на реформите на патот кон ЕУ за што се обврзува Република Македонија.

– Уверен сум дека во наредните месеци ќе имаме одлична и блиска соработка во спроведувањето на сите неопходни реформи поврзани со процесот на интеграција во ЕУ, истакнал вицепремиерот Османи, додавајќи дека Австрија останува да биде еден од најзначајните партнери и силен поддржувач на политиката на проширување и членство на земјите од Западен Балкан.

Од Кабинетот на вицепремиерот информираат дека тој потенцирал оти останува фокусот на исполнување на обврските коишто произлегуваат од Итните реформски приоритети од Прибе и Договорот од Пржино. Вицепремиерот Османи изразил надеж дека очекуваните резултати ќе се постигнат преку обезбедување одржлив пристап во спроведувањето на клучните реформски активности и на тој начин би се отстранила условеноста на препораката од последниот извештај на ЕК за земјата.

Двајцата соговорници се согласиле дека не очекува период на интензивна работа со цел државата побрзо да се врати на патот кон ЕУ.