Се потпишува онлајн петиција „Да се запре пренамената на старата зграда на Државниот архив на Р.М“ иницирана од проф. д-р Катерина Тодоровска, научен советник во Институтот за национална историја.

„Замолувам да се приклучите со громогласно пишување на вашата поддршка на оваа моја идеја. Ова посебно го адресирам и кон вработените во Државниот архив на Република Македонија кои немаат воздух во канцелариите, немаат дневна светлина во канцелариите, се гушат на 7-ми кат во новата зграда на Архивот, која во никој случај не располага со соодветни услови за чување на архивска граѓа“- пишува во петицијата на Тодоровска.

Зградата на Државниот архив датира од крајот на 60-ите години од минатиот век. Но, по речиси пет децении, сега државните архивски материјали се отстранети од природната средина и се преселени во простории на новиот Археолошки музеј покрај Вардар, кој е дел од проектот „Скопје 2014“.  Дополнително, сега објектот на Архивот се прилагодува за нова намена –  Јавно обвинителство -Одделение за организиран криминал.

Тодоровска побара стопирање на сите работи во старата зграда. Вели дека се уништува национална историја и ја повика министерката за култура, Елизабета Канческа-Милевска да поднесе кривична пријава против „изумителите и сторителите на овој уништувачки акт“.  Таа пред неколку месеци испрати отворено писмо до Јавниот обвинител,  Марко Зврлевски од кого побара да реагира за заштита на повисоки и државни интереси.