Од Обединетата македонска дијаспора (ОМД) оценуваат дека вчерашното доделување на мандатот на лидерот на СДСМ, Зоран Заев треба да се прифати како чекор напред кон смирување на политичката криза во државата. 

Според ОМД тоа е промена со која се очекува Македонија да започне да гради граѓанско општество кое ќе ги почитува основните македонски принципи, унитарноста на државата, националниот интерес и почитувањето на институциите и правниот систем. Се надеваат дека Заев ќе ја подобри сликата за Македонија во странство. 

„ОМД го повикува Заев на разумно одлучување при формирањето на министерските позиции и при поставувањето квалитетен и стручен кадар без криминално досие чиј приоритет ќе биде заштитата на националните интереси на Македонија. Од оваа организација сугерираат да се разгледа можноста за формирање на министерство за дијаспората со кое, како што се посочува, би се продлабочиле односите меѓу Македонија и македонските иселеници и би се овозможиле шанси за нивно учество во економскиот развој на државата и директно учество во спроведувањето на демократското владеење“ - велат од ОМД. 

Заев, како што велат од ОМД, доби историска можност да игра важна улога во градењето на иднината на Македонија.

ОМД се надева дека тој ќе го искористи овој момент за подобрување на имиџот на Македонија во странство, со тоа што ќе работи на враќање на Македонија на вистинскиот пат за целосна евро-атлантска интеграција без никакви условувања за името и идентитетот на Македонија. 

Како лидер на парламентарното мнозинство, ОМД очекува од Заев да ја состави и води новата влада на Македонија по западните демократски принципи со потполно почитување и спроведување на правниот систем. ОМД инсистира на реконструкција на економијата во Македонија, зајакнување на здравствениот, социјалниот и образовниот систем, вклучувајќи и создавајќи можности за нови работни места со што ќе се намали невработеноста на Македонија, како и подобрување на патната инфраструктура, се вели во соопштението.

ОМД го повикува Заев да оствари соработка со опозицијата, а од ВМРО-ДПМНЕ се бара да биде силна и конструктивна опозиција.