Охридскиот Регион нема да биде ставен на Листата на светско наследство во опасност на УНЕСКО. На 48-та сесија на Комитетот за светско наследство што се одржува во Бусан, Јужна Кореја, беше донесена одлука на земјава да ѝ се даде нов, дополнителен рок од пет години за целосно спроведување на препораките за заштита.

Одлуката беше изгласана со мнозинство од 16 гласа „за“ од вкупно 21 членка на Комитетот. Со ова се прифати барањето упатено од Владата и општините од регионот преку официјално писмо во кое се наведени конкретни приоритети и временски рокови за зачувување на Охридското Езеро и заштитениот појас.

Македонската делегација во Јужна Кореја ја предводеше македонскиот амбасадор во Париз, Игор Николов, придружуван од претставници на повеќе државни институции.

Првичниот предлог беше загрижувачки

Во првичниот нацрт-текст пред гласањето, експертите на УНЕСКО предлагаа Охридскиот Регион (кој се дели со Албанија како заедничко природно и културно добро) веднаш да биде впишан на листата на загрозено наследство. Како главни причини беа посочени:

 Недоволниот напредок во исполнувањето на препораките.

 Неотстранетите закани за биодиверзитетот, урбанистичкиот хаос и дивиот градежен замав.

 Владата бараше 6, УНЕСКО одобри 5 години

Премиерот Христијан Мицкоски посочи дека државата побарала шестгодишен грејс-период, со оглед на тоа што проблемите кои се наталожувале со децении не можат да се решат преку ноќ. Дополнително, за ефикасна заштита е потребна целосна координација и со суседните албански власти.

Клучните предизвици остануваат на локално ниво: Издавањето дозволи за градба и отстранувањето на нелегално изградените објекти сè уште се под ингеренција на локалните власти (општините Охрид и Струга), кои ќе мора драстично да ги затегнат контролите, бидејќи УНЕСКО под лупа ќе го следи секој чекор.

Повторување на сценариото од минатата година

И на претходната сесија на Комитетот имаше иста препорака за впишување на Охрид на Листата во опасност, но тогаш на Македонија ѝ беше даден краток рок од една година. Ваквите одложувања претходно предизвикаа сериозни реакции кај граѓанските и еколошките организации, кои постојано алармираат дека политичките одлуки го занемаруваат мислењето на независните експерти на УНЕСКО.