Одземен пасошот и возачката дозвола на пратеникот на Левица,Сашко Јанчев
Кривичниот суд во Скопје ги прифати мерките на претпазливост што ги предложи Обвинителството за пратеникот на Левица, Сашко Јанчев, по неговото учество во сообраќајна несреќа во Марино вчера по полноќ.
Пратеникот од Гевгелија е осомничен за тешки дела против безбедноста на луѓето и имотот во сообраќајот. Управувајќи со „Хјундаи тусон“ удрил во мопед „Јијинг“ управуван од 16-годишен малолетник. Од судирот тешко беа повредени возачот на мопедот и неговата 13-годишна сопатничка, додека полесни повреди доби сопатникот на Јанчев.
„Сообраќајната несреќа се случила ноќеска по полноќ, при удар на нерегистриран и неисправен моторцикл без светло, управуван од малолетник без возачка дозвола и без заштитна кацига, кој возејќи со неприлагодена брзина на патот, практично се забил во совозачката врата на автомобилот управуван од пратеникот Јанчев, кој во тој момент имал вклучен жмигавец за вртење десно (види слика од лице-место).Според досегашните информации на очевидци, пратеникот управувал со возилото совесно, согласно сообраќајните правила и прописи, односно со пропишана брзина и НЕ бил под никакво дејство на алкохол (бидејќи Јанчев воопшто не ни пие алкохол)!“,се огласи синоќа Левица.
Со одлуката, на Јанчев привремено му се одземаат патната исправа и возачката дозвола, со што му се ограничува можноста да ја напушти државата и повторно да управува моторно возило. Целта на ваквите мерки е да се обезбеди негово присуство и непречено водење на кривичната постапка.
Според извршените анализи, ниту еден од возачите не бил под дејство на алкохол или други супстанции. Автомобилот и мопедот се подигнати за вонреден технички преглед, а во тек е и сообраќајно вештачење
„Во несреќата се повредени пратеникот Јанчев и негов сопатник (едниот со повреди на кичмата, а другиот со потрес на мозокот), како и малолетна сопатничка на возачот на моторциклот. За жал, малолетниот возач на моторциклот е најтешко повреден и е пренесен на болничко лекување.
Изразуваме длабоко жалење за оваа трагична ситуација и упатуваме искрени желби и намери до семејството на повредениот млад човек за негово што побрзо и целосно оздравување. Стоиме на располагање и тука сме за било што, што е потребно во процес“, дополнуваат од Левица.
Слично
Поврзани вести
