Оџакот на „Физикална терапија“ го труе Скопје
Државниот инспекторат за животна средина по добиени пријави изврши надзор во Институтот за физикална терапија и рехабилитација во Скопје, каде било констатирано дека неисчистениот оџак и греењето на мазут го загадува Скопје.
„Во текот на изминатите денови, Државниот инспекторат за животна средина доби бројни претставки за емисии во воздухот од Институтот за физикална терапија и рехабилитација во Капиштец преку новата алатка за пријавување загадување. Затоа на 3-ти февруари се спроведе координиран надзор со инспектори за животна средина од Градот Скопје и од Дирекцијата за заштита и спасување.
Беше констатирано дека болницата работи без Елаборат за животна средина, која е обврзана законски да го поседува, по што веднаш беше задолжена да го изработи во најкус можен рок, а оџаците од котлите на мазут да се чистат редовно, согласно со Правилник во надлежност на Дирекцијата за заштита и спасување. Чистењето оџаци го подобрува согорувањето и го намалува загадувањето. За постапувањето со медицински отпад немаше забелешки“, објави инспекторатот.
Од таму го задолжиле Институтот да спроведе мерења на емисиите во воздухот од страна на акредитирана лабораторија и да се подобри одржувањето на котелот, кој е во видливо лоша состојба. По обезбедување финансиски средства треба во најитен можен рок да се напушти горењето мазут и да се премине на природен гас, да се вградат сончеви колектори и да се подобри енергетската ефикасност.
Слично
Поврзани вести
