Основното јавно обвинителство Прилеп наредни истражна постапка против 31-годишниот скопјанец М.Ј. кој во Грција требало да продаде марихуана во вредност од 200.000 евра.

„Осомничениот, на 20 октомври, на патот Прилеп-Градско, неовластено пренесувал 45,085 килограми наркотична дрога марихуана помешана со тутун наменета за понатамошна продажба. Дрогата ја набавил во Струга и ја ставил во патни торби, па едната од нив ја ставил на задното седиште, а другите две во багажникот на автомобил Пежо 306. Движејќи се во правец кон Градско со возилото, во близина на бензинска пумпа на излезот од Прилеп, осомничениот бил сопрен и контролиран од страна на полициски службеници. При прегледот на возилото, полициските службеници ги пронашле патните торби со дрога и ги одзеле“, објави ОЈО.

Судијата на претходна постапка од Основниот суд во Прилеп го прифати предлогот и со решение на осомничениот му определи мерка притвор во траење од 30 дена.​

Според МВР, дрогата била пронајдена во патничко возило „пежо карван“, со скопски регистарски ознаки, управувано од 31-годишниот М.Ј. од Скопје и при извршена контрола било констатирано дека лицето не поседува возачка дозвола и возилото не било технички испрвно, а по извршениот преглед биле пронајдени две патни торби во кои имало 9 големи пакувања марихуана, во вкупна количина од 50 килограми и вредност од околу 200.000 евра.

Возачот е лишен од слобода и се преземаат мерки за утврдување на евентуална инволвираност и на други лица при транспортот на дрогата, објави вчера МВР.