Европската унија од 2027 година воведува значајни промени при купувањето автомобили, со кои плаќањето во готово за повисоки износи практично ќе стане минато.

Според новите правила, од 10 јули 2027 година ќе важи ограничување за готовински плаќања до максимум 10.000 евра на ниво на цела ЕУ. Тоа значи дека сите трансакции над оваа сума нема да смеат да се вршат во готово, што директно ќе влијае врз пазарот на автомобили, каде цените најчесто го надминуваат овој праг.

Целта на новата регулатива е да се спречат нелегални финансиски текови и перење пари, а за купувачите и продавачите тоа значи премин кон банкарски трансфери, кредити и други дигитални начини на плаќање.

Дополнително, новите правила предвидуваат и задолжителна проверка на идентитетот при плаќања од 3.000 евра нагоре. Во такви случаи, продавачите ќе мора да ги евидентираат личните податоци на купувачите и да ги чуваат најмалку пет години. Оваа мерка значително ја намалува анонимноста и ја зголемува транспарентноста во трговијата.

Регулативата прави јасна разлика меѓу купување од трговец и приватна трансакција. Ограничувањето од 10.000 евра важи за продажба преку дилери, додека кај купување од физичко лице сè уште ќе биде можно плаќање во готово без фиксна граница – доколку ниту една страна не делува како деловен субјект.

Се очекува овие промени да влијаат врз однесувањето на купувачите, кои можеби ќе се свртат кон приватниот пазар за да ја задржат можноста за готовинско плаќање. Во исто време, експертите оценуваат дека мерките ќе ја зголемат довербата во пазарот и ќе го отежнат прикривањето нелегални активности.

Со новите правила, купувањето автомобил со готовина кај официјални продавачи станува речиси невозможно, а дигиталната трага на парите ќе стане задолжителна за секоја поголема трансакција.