Основното јавно обвинителство Кочани ја прошири истрагата за пожарот во дискотеката „Пулс“ во Кочани каде изгореа 62 лица, со тоа што го вклучи и сопственикот на самиот објект кој му го издавал на правното лице што го менаџирало кабарето.

Ова лице, како што извести ОЈО Кочани, е осомничено како соизвршител за тешки дела против општата сигурност. До судијата на претходна постапка доставен е предлог за определување мерки за претпазливост.

„Од дејствијата преземени во текот на досегашната постапка се обезбедија докази кои упатуваат на основано сомнение дека осомничениот, како сопственик на недвижниот имот – објект во кој со години функционирала дискотеката, го издавал под закуп на еден од претходно осомничените. Без да поднесе барање и да добие одобрение за пренамена на објектот од надлежен орган, заеднички и во договор со осомничениот неформален сопственик на правното лице, тој на различни датуми и во повеќе наврати во временскиот период од 2012 година до месец март 2025 година преземал градежни активности со кои извршил и учествувал во незаконска пренамена на објектот од намена Г3 – сервиси и сообраќајна инфраструктура во намена Б3 – големи угостителски единици и овозможил во објектот незаконски да се врши угостителска дејност дискотека/ кабаре“, објави Обвинителството.