Обвинителство покренува истражна постапка против пазарен инспектор од Струмица, кој наместо да евидентира прекршоци барал и земал мито. 

Како што соопштуваат од Основното јавно обвинителство Струмица донесена е наредба за спроведување истражна постапка против едно лице за кое постои основано сомнение дека сторило две кривични дела примање поткуп од член 357 став 1 од Кривичниот законик.

- Како службено лице – помлад пазарен инспектор, осомничениот струмичанец во два наврати директно побарал и примил парични средства од лица од Радовиш за да не изврши службени дејствија што морал да ги изврши - соопштија денеска од Јавното обвинителство на Република Северна Македонија

Од таму прецизно ги посочија дејствијата на пазарнот инспектор. 

- Во првиот случај, при инспекциски надзор на 13 јуни, констатирал дека правен субјект нема регистрирано занаетчиска дејност, но за да не го констатира прекршокот од сопственикот побарал и примил 100 евра. На 17 ноември, во деловен простор затекнал две лица кои вршеле берберска дејност без да бидат запишани во занаетчискиот регистар и од нив исто така побарал 100 евра за да не го констатира прекршокот на записник. Бидејќи тие во моментот немале толку пари кај себе, тој уште 2 пати се вратил во дуќанот и од нив примил по 3.000 денари - појаснуваат од Јавното обвинителство.

По предлог на јавниот обвинител, судијата на претходна постапка од Основниот суд во Струмица определил мерка притвор во траење од 30 дена за осомничениот.