Тим од обвинители од Јавното обвинителство вчера со колеги од Косово оствариле средба заради обезбедување докази во врска со предистрагата за работењето на Клиниката за радиотерапија и онкологија наодите дека скапи лекарства од таму се продавале на косовскиот црн пазар.

„Од косовските органи, преку контакт-точките во Европската правосудна мрежа, се побарани конкретни податоци неопходни за проверка на наводите врз основа на кои беше отпочната предистрагата. Притоа, косовските обвинители изразија подготвеност за соработка и за обезбедување на потребните податоци“, објави Обвинителството.

Од таму најавуваат дека најверојатно слична ваква средба ќе биде организирана и во обвинителството во Албанија и дека во меѓувреме секојдневно се вршат распити на пациенти и нивни блиски, на стручни медицински и на други лица кои би можеле да имаат определени сознанија.

„Министерството за здравство до Јавното обвинителство го достави извештајот од Државниот здравствен и санитарен инспекторат кој се однесува на работата на Клиниката за онкологија.

Исто така, по наредба на јавните обвинители, во тек е финансиска истрага, како и детално вештачење на економско-финансиското работење на Клиниката кое го врши тим од вешти лица, ревизори од Државниот завод за ревизија и претставници на Фондот за здравствено осигурување“, додаваат од таму.