Јавен обвинител од Основното јавно обвинителство Скопје поднесе Обвинителен предлог против едно лице кое се товари за продолжено кривично дело – Оддавање службена тајна согласно член 360 став 1 во врска со член 45 од Кривичниот законик.

Во повеќе наврати во текот на јули 2020 година во Скопје, обвинетиот, на возраст од 56 години, и сторил достапни на јавноста документи од поранешната Управа за безбедност и контраразузнавање, сегашна Агенција за национална безбедност, до кои дошол на незаконит начин. Документите биле класифицирани како службена тајна со степен на доверливост „строго доверливо“ и се однесувале на оперативно истражување на УБК.

Така, на 07.07.2020 година обвинетиот на прес-конференција презентирал фотокопии од делови од работа верзија на документ – Извештај од разговор со лице кое соработува со УБК и една службена белешка. На 8, 9 и 12 јули 2020 година, на својот Фејсбук профил продолжил да објавува делови од класифицирани документи, меѓу кои и транскрипти од разговори со таргети во тогашната УБК.​

За ова лице нема иницијали во соопштението.

Според архивите од медиумите, точно на 7 јули лани, прес конференција одржа Љупчо Палевски.

Тој тогаш рече дека во период пред референдумот биле прислушкувани и следени, новинари, политичари и активисти на движењето „Бојкотирам“.

Кодното име на операцијата, според него, било „Атлантик“ и истата се одвива во период пред референдумот кога се следат сите противници на промената на името и против нив се калемат тешки обвинувања за домашен тероризам и македонски екстремизам.

По завршувањето на прес конференцијата Љупчо Палевски на новинарите им ги даде документите кои, како што тогаш реше, ги докажувале овие тврдења.