Обиени просториите на партијата на Стоиљковиќ, за ВМРО-ДПМНЕ ова е скандал
Седиштето на Демократската партија на Србите во Македонија во Скопје, чиј претседател е пратеникот Иван Стоиљковиќ, синоќа е обиено од непознат сторител.
Обиена е вратата, а внатре имало претурање по документите.
Стоиљковиќ вели дека се работи за обид за политички притисок и заплашување на членството. Додава дека случајот е пријавен во Министерството за внатрешни работи.
ВМРО- ДПМНЕ најостро го осудува вандалскиот чин на обивање на седиштето на Демократската партија на Србите во Македонија.
„Да се нападне и да се претура по седиштето на партијата во предизборен период е скандал кој остава темна дамка на демократијата и на предизборниот процес. ВМРО- ДПМНЕ бара Министерството за внатрешни работи конечно да почне да ја врши улогата и обврските кои ги има согласно Уставот и законите. Наместо да се злоупотребува униформата и ресурсите во политички цели, министерството мора веднаш да ги пронајде виновниците на овој вандалски чин и да ги изведе пред лицето на правдата. Во спротивно, нивното неказнување ќе биде уште една порака која ќе ги поттикне насилниците да предизвикуваат уште вакви инциденти во предизборниот период“ - се вели во соопштението на ВМРО-ДПМНЕ.
Слично
Поврзани вести
