Тимовите на Институтот за судска медицинa ја завршија обдукцијата на телатакои веднаш беа донесени по пожарот во модуларната болница во Тетово. Директорот на Институтот, д-р Александар Станков за Фактор потврди дека постапката е завршена, но напомена дека во координација со Министерството за здравство е договорено сите детали за случајот да бидат соопштени оттаму. Исто така, директорот Станков посочи и дека извештајот од обдукцијата е испратен и до Основното јавно обвинителство.

Оттаму, пак, како што соопштија, по извршените анализи  е утврдено дека од починатите, осум се жени и шест мажи, на возраст од 29 до 78 години. ОЈО информира дека од вкупниот број, односно од 14-те тела нив 12 лица биле хоспитализирани како пациенти, додека две жртви се надворешни лица кои не биле хоспитализирани. 

Инаку, во Институтот за судска медицина е донесено и неопожарено тело на помлада пациентка, болна од корона вирусот, а која починала во момент кога избувнал пожарот. Лекарите, пред да избувне пожарот ја реанимирале, но постапката била прекината кога пожарот нагло се проширил. Таа е всушност 15-тата жртва донесена во Институтот за судска медицина врз чие тело е извршена обдукција. Телата на починатите во трагедијата во Тетово денеска веќе им се предаваат на најблиските.

А.Б.