О2 Иницијатива: Да му се наложи на Усје да работи на гас
О2 Иницијатива се огласи во јавност дека најавените когенеративни централи кои ги најавува власта се само губење време против загадениот воздух и од таму побараа фабриката за цемент да работи на природен гас.
„Наместо Владата/град Скопје да ни губат драгоцено време и да ни го трошат здравјето, здравјето на децата пред сè, кои се изложени на овој канцероген и токсичен воздух:
- Зошто не направат пилот проект со неколку различни видови на филтри, да ги видат ефектите од секој од нив, да се види како ќе се покажат и да вложат во масовна примена за тие што ќе го поминат тестот, со што за една година би се решил проблемот со домаќинствата?
- Зошто не донесат одлука, индустријата во Скопје, вклучително и Усје, задолжително да работи на гас и обновливи извори на енергија?
- Зошто не го нормализираат јавниот превоз и го донесат конечно правилникот за еко налепници, со што ќе има можност да се воспостави зимски режим на сообраќај?
- Зошто не се фокусираат на измена на начинот на греење на јавните објекти?
Ова е најбрз начин да се намали загадувањето во прифатливи законски рамки во многу краток рок.
Дополнително, има и други мерки, кои не се комплексни за спроведување, а се однесуваат на градежна, почвена прашина, палење на отпад на отворено“,реагираат овие екоактивисти.
Од таму додаваат дека мерењата покажале дека најголеми загадувачи се домаќинствата, нерезиденцијалните објекти,Усе, сообраќајот, Макстил, ТЕ-ТО, но и косовската фабрика за цемент.
„Хани и Елизит цементара (Косово) - вкупни емисии од цементарата се проценети на 319 тони. Ако се земе предвид дека цементарата се наоѓа на 11.5 км северно од Скопје, правците на ветрови, дисперзијата, врнежи и др., се проценува дека околу 35 тони би стигнале до Скопје. (2.5-2.7%)
Ако се земе предвид ружата на ветрови за Скопје, каде доминираат северните правци, се проценува дека околу 75 тони се депонираат во Скопје.
За Дрисла, која по воздушна линија е на 4 км од јужните делови на Скопје, вкупните емисии се проценуваат на 0,01 тон.
Емисиите од авио сообраќајот на скопскиот аеродром се проценуваат на 14 тони.
Мерењата на Амбикон, лабораторијата на локација Ново Лисиче и Карпош во текот на 2021 г. ги дадоа следните резултати:
- во зимските месеци најголем удел има греењето на дрва, 36-59%. Потоа сообраќајот, 12-28%. На согорувањето на нафта и мазут, дали за греење или во индустрија отпаѓа од 7-14%.
- во пролетните месеци горењето на разен отпад на отворено има удел од 7-35%
- во летните месеци почвената, градежна прашина е од 4-46%
- уделот на индустријата/производни процеси вон грејна сезона се движи од 15-49%
За Усје, најбрз начин да го сведе на минимум своето загадување е да му се наложи да користи гас во своите процеси, наместо јаглен, кокс, отпад и др.
Во однос на казната и кривичната кон Усје за загадување, чисто да нема дезинформации, таа се однесуваше на надминување на азотните оксиди, не на PM2.5 и PM10,“, додаваат од таму.
Слично
Поврзани вести
