Бројот на должници за данок се зголемува. На новата, втора по ред листа на даночни должници објавена од УЈП запишани се нови 127 имиња, а вкупниот долг е зголемен за околу осум милиони евра. На листата сега се наоѓаат 3.635 компании и граѓани, а нивниот долг за даноци изнесува 193 милиони евра. Од УЈП се надеваа дека јавната објава на должниците ќе ја зголеми нивната свест и ќе ги поттикне да си ги платат долговите. „За мерење на ефектите од јавното објавување на даночните должници треба да поминат барем неколку објави, за да може да се вршат и споредбени анализи. Но, сепак, првичните резултати се дека значителен дел од даночните должници кои се најдоа на првата листа, ги нема и во втората. Од друга страна, на листата се наоѓаат и нови должници, кои ги немаше во претходната“, велат од УЈП за Утрински весник. На списокот повторно меѓу поголемите должници има и јавни и комунални претпријатија. Меѓу нив се и „Македонска радиодифузија“, Град Скопје, ЈП „Улици и патишта“, Шумарски факултет, Медицински факултет, ЈП „Комуналец“ Струга, ЈП „Билјанини извори“ Охрид, Агенција за привремени вработувања Прилеп, Општина Охрид , ЈП „Погребни услуги“ Охрид, Општина Дојран... Најголем должник и на новата листа е фирмата „Индустрија ел азтека“ од Чаир, која должи 17,81 милиони евра, долг кој е дури и малку поголем од оној што го имаше на претходниот список.