Просечната месечна исплатена нето-плата по вработен во мај годинава изнесува 36.465 денари и во однос на мај лани  е зголемена за 16,1 процент, објави Државниот завод за статистика.

- Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Административни и помошни услужни дејности (25,5 проценти), Стручни, научни и технички дејности (21,4  проценти) и Финансиски дејности и дејности на осигурување (18,8  проценти) - соопштуваат од ДЗС.

Зголемување на просечната месечна исплатена нето-плата по вработен, во однос на претходниот месец, е забележано во секторите: Други услужни дејности (5,3 проценти), Стручни, научни и технички дејности (5 отсто) и Транспорт и складирање (4,3 проценти).

Просечната месечна исплатена бруто-плата по вработен, во мај 2023 година, изнесува 54.675 денари.

Што се однесува пак до претходниот месец, просечната нето-плата во април достигна вредност од 36.134 денари и е зголемена за 14,6 отсто во однос на истиот месец претходната година.