Хрватски лекари масовно заминуваат во Норвешка каде се нудат десет пати поголеми плати.

Според податоци од Хрватската лекарска комора откако земјата влезе во ЕУ, 1100 лекари подготвиле документи и побарале од комората да го напуштат системот.

Овој тренд ќе продолжи поради примамливите понуди од европските земји.

„Побарувачката за хрватски лекари е голема, затоа што се познати како многу вредни и добро образовани. Одредени болници дури инсистираат на хрватски лекари. Од друга страна понудите кои се даваат на лекарите се фантастични. Почнавме пилот проект со Норвешка, земја која не е во ЕУ, но има одличен стандард и на лекарите им нуди одлични услови“ - вели Зринка Гугиќ, која има фирма за посредување за работа во странство.

Таа додава дека животот на северот на Европа е поволен за цени, даноци и плати.

Откако ќе потпишат договор со болница во Норвешка, лекарите мора да го изучуваат норвешкиот јазик.

Курсот се реализира шест месеци во Хрватска, а за тоа време лекарите добиваат стипендија од болницата.

Медицински кадар се бара и за во Шведска каде се отвараат нови болници.