Министерот за транспорт Александар Николоски, по средбите во ОАЕ како дел од владината делегација, од вчера е во дводневна работна посета на Обединетото Кралство.

Предвидено е вицепремиерот да оствари работни средби со Герет Томас, министер за бизниси, извоз и услуги, со министерот за Европа, Стефан Доти, како и со Дејм Карен, специјален пратеник на премиерот на Велика Британија за Западен Балкан. 

Според агендата, предвидени се средби и со претставници од бизнис заедницата во Лондон. Министерството за транспорт соопшти дека тема на работните средби е зацврстување на стратешката соработка меѓу Република Македонија и Обединетото Кралство. Предвидено е на средбите да се разговара за економската и трговска соработка со посебен фокус на инвестиции во инфраструктурниот сектор.

Покрај економските теми, ќе се потврдат и добрите политички односи меѓу двете земји.

„Обединетото Кралство е стратешки партнер на Република Македонија во НАТО Алијансата и земја на второ место со која остваруваме најголем обем на трговска размена“, оцени министерството предводено од Николоски.