Никола Димитров, вицепремиерот за евроинтеграции, во „Студио 10“ на ТВ24 претпладнево рече дека датумот на посетата на Марк Руте, како прв холандски премиер кој некогаш ја посетил Македонија, била случајност, а неговото доаѓање било најавено уште летоска во текот на Европското фудбалско првенство.

Руте пристигна во Македонија минатата недела, откако стана јасно дека власта го загуби парламентарното мнозинство, а еден ден потоа пратеникот Кастриот Реџепи не се појави во Собранието и опозицискиот блок не успеа да изгласа недоверба на Владата.

- Посетата на холандскиот премиер беше најавена кога се видовме во Амстердам, заедно гледавме фудбалски натпревар. Премиерот Руте рече - мислам дека е добро да дојдам да дадам сигнал на поддршка. Бидејќи Холандија е една од најригорозните земји кога е во прашање проширувањето на ЕУ . Денот на неговото доаѓање беше определен доста одамна. Се погоди така како што се погоди, рече Димитров.

Македонија и Холандија играа меѓусебно во третото коло од Европското фудбалско првенство изминатото лето.

Димитров ја искритикува ЕУ дека 20 месеци не може да ја спроведе сопствената одлука и остави простор, ако не во декември, да ги започнеме преговорите во јануари, со оглед на тоа дека само што завршија изборите во Бугарија.

- Сигналите што ги добиваме зборуваат дека обидот ќе биде фокусиран следниот месец, но и јануари не се исклучува како месец во кој ќе има пробив во евроинтеграциите. Од неколку главни градови слушам дека и во јануари се остава можност да се успее, истакна вицепремиерот.