„НИЕ ПРЕВЕНТИВНО НЕ ДЕЈСТВУВАМЕ“: теологот Галевски за свирепото убиство на Росица 'државата има улога на бирократски архивист'
Бруталното убиство на 31-годишната Росица и нејзиниот татко во Велес, повторно ја разбранува јавноста, и на темата се огласија голем број граѓани, најмногу со револт на институционалната негрижа, која резултираше со трагедија.
На темата за потребата од заштита на жените кои се малтретирани од нивните партнери, поранешни партнери, пред да бидат убиени, се огласи и теологот Никола Галевски.
Тој упати остри критики кон институциите, особено кон потребата „нешто да се случи“ за да се дејствува, укажувајќи дека ги поддржува сите кои сакаат нешто да променат во државата со цел да се спречат вакви трагедии.
- Росица била психички и физички сотрена, малтретирана долго време, на крајот убиена заедно со нејзиниот татко. Мојот револт е кон полицијата, кон отсуство на систем на државна заштита и превентива кое ова ќе го спречеше. Гневот (премек збор) е уште поголем поради фактот што сум татко на ќерка, поради точките на поистоветување со овој грозоморен процес со фатален крај.
Како пастор сум пријавувал насилство и малтретирање жени. Од полицијата сум добивал еден одговор: ние превентивно не дејствуваме. Мора да се случи нешто за ние да интервенираме, такви се законските одредби.
Да резимирам: жените се незаштитени, оставени да трпат спектар на малтретирање, убивани се сѐ повеќе и повеќе, а полицијата и државата имаат улога на бирократски архивисти - да констатираат насилство и смрт - укажа Галевски.
Тој потоа дополни дека сите граѓански организации кои се борат за заштита и правата на жената ја имаат неговата безрезервна поддршка без разлика дали се лево или десно ориентирани, дали се атеисти или верници, дали се дел од црквите или имаат најдлабока желба црквата и мене како нејзиин претставник да ме снема.
- Жената во Македонија е во подредена, дискриминирана положба по многу прашања. Трпи насилство и ја убиваат. Доста е. Мора да биде заштитена на секој начин сега и веднаш. И ако ова што го кажав ме става во категоријата "феминист", јас со гордост ќе ја носам таквата квалификација и ќе продолжам да се залагам за рамноправност и целосна заштита на жената.
Дел од оваа борба ќе биде конкретизација на планот нашата црква да отвори засолниште за жени жртви на насилници (не на "насилство", зашто насилството не е природна непогода која може да му се случи некому туку има субјект - насилник или убиец) и под закана на женоморство.
Обид, со Божја помош да се спасат барем неколку жени пред да бидат убиени или доведени до состојба на крајна дехуманизираност - нагласува Галевски.
Слично
Поврзани вести
