Поранешниот шеф на УБК, Сашо Мијалков секој четврток до 12 часот ќе треба да се јавува во Основниот суд Скопје 1 и му се одзема неговата патна исправа. 

СЈО бараше притвор за Мијалков, а тој се жалеше на одлуката за одземениот пасош и бараше да се поништи одлуката за определените мерки за претпазливост и да му се врати пасошот. Апелацискиот суд одлучи да ја одбие жалбата на СЈО и да ја потврди одлуката на првостепениот суд. Меѓу фактите и околностите кои судот ги земал во предвид за да ја донесе ваквата одлука, според решението објавено на страната на судот се и тоа што Мијалков се појавил на јавната седница и дал ветување дека редовно ќе се јавува во судот. 

Судот, се вели во решението, го ценел и фактот што работните ангажмани на Мијалков се во Република Чешка и неговите егзистенцијални релации се  надвор од Република Македонија, но истата не ја цени како изолирана од другите околности. Оттука, се вели во решението, жалбата на СЈО е неоснована.

Ставот на судот да прифати поблагата мерка за определување на присуство за Мијалков, а не да му определи притвор е поткрепена и со тоа дека обвинетиот се појавил на јавната седница на Апелацискиот суд и дал ветување за негово присуство во текот на постапката.

Мијалков претходно изјави дека е невин, нема зошто да бега и ќе се јавува на суд. 

СЈО побара притвор за Мијалков поради опасност од бегство.

Поранешниот директор на Управата за безбедност и контразузнавање, Сашо Мијалков е обвинет во споениот случај „Таргет“ и „Тврдина.