Министерството за образование и наука нема да ги плати фактурите кон Јавното сообраќајно претпријатие - Скопје за бесплатниот студенски превоз висок 8 милиони евра бидејќи немало правен основ. 

Имено, на новинарско прашање дали Министерството за образование и наука ќе го подмири долгот кон ЈСП-Скопје за бесплатниот студентски превоз во висина од осум милиони евра, министерката Весна Јаневска со одговор дека фактурите се пристигнати, но нема правен основ по кој Министерството би ги платила фактурите за бесплатниот студентски превоз.

- Нема правен основ по кој Министерството би го исплатило тој долг. Нема спогодба, нема договор, нема Владина одлука. Така што, јас повторувам, и да сакам не можам, а јас сакам студентите да имаат слободен превоз и за следната година. Ние планираме средства за слободен превоз на студентите. Но, тоа мора да се реши на поинаков начин. За мене како министер начинот е судот да одлучи, како ќе одлучи судот така ќе постапуваме - изјави Јаневска.

Таа повтори дека за идната година Министерството за образование и наука и Владата имаат планирано средства за слободен превоз на студентите. 

Воедно Јаневска најави дека студентите годинава ќе имаат повеќе пари за студентски оброк, односно дека е планирано зголемување на студентскиот оброк, но засега не може да каже за колку ќе биде зголемен, бидејќи како што вели се зависи од буџетските средства кои ќе им бидат дадени на располагање.

- Што се однесува до студентскиот стандард студентите не треба да имаат дилема дека Министерството ќе биде постојан нивен соработник, партнер и поддржувач, всушност ќе биде најголем нивен поддржувач, па оттука еве им испраќам порака дека - да, размислуваме за покачување на студентскиот оброк. 

Влеговме во проект на реновирање на студентските домови за тие да имаат подобри услови за живот и учење и факт е дека капацитетите се малку намалени, но се обидуваме тоа да го решиме со тоа што ќе ги пренасочиме дел од студентите кон употребливите ученички домови и ќе се погрижиме максимален број на студенти да добијат легла за да можат нормално да живеат во градовите каде што ќе студираат - вели Јаневска.