„Нефи ИК“, фирмата на контроверзниот бизнисмен Нефи Усеини од Охрид доби дел од тендерот за зимско одржување на државните патишта. Неговата фирма добива 4,3 милиони денари и е меѓу оние кои ја поделија јавната набавка тешка 188,8 милиони денари.

Меѓу фирмите е и „Диктор ЦД“ на Зоран Иванов, син на поранешната генерална секретарка на Собранието, Цветанка Иванова. Неговата фирма добива над 39,5 милиони денари. „ЈА-МИ“ на градоначалникот на Кавадарци, Митко Јанчев пак, добива 35,7 милиони денари, за зимско одржување на дел од патиштата.

Фирмата „Ган-Логистик“ на Бурим и Насер Ибиши и Кренар Ибраими пак, добива речиси 39,3 милиони денари за дел од овој тендер. За 33,5 милиони денари, во групата се вклучува и тетовската „Инфраструктура“ која е во сопственост на Абдурахим Алија.

Во групата фирми кои ќе ги одржуваат патиштата е и „Јан Констракшн“, чии сопственички се Доста Стојаноска и Наташа Јанкулоска. Фирмата од овој тендер добива над 24 милиони денари. Дел од овој тендер е и битолската „Зимак“, сопственост на Роберт Рајкоски, на чија сметка ќе легнат речиси 4,4 милиони денари. 

Јавното претпријатие за одржување и заштита на магистралните и регионалните патишта овие договори ги прави за оваа зима, односно сезоната 2025/2026 година, а се наведува како „ангажирање на трети лица“, бидејќи претпријатието самостојно не може да се справи со снегот. 

Меѓу другото, се бара камионите кои ќе го чистат снегот да имаат вграден ГПС, а возачите сами да се снабдуваат со храна, но кога ќе тргнат на пат, со себе да имаат храна за 24 часа.