Во Кочани денеска се одржа нов „Марш за ангелите“, што го организираат родителите на загинатите млади во пожарот во дискотеката „Пулс“. Маршот почна во 14:05 часот од Паркот на револуцијата, продолжи низ центарот на градот, покрај Управата за јавни приходи и полициската станица, а заврши пред Основниот суд.

Пред судот, родителите уште еднаш побараа правда, одговорност и целосно расветлување на трагедијата, нагласувајќи дека протестите ќе продолжат додека институциите не обезбедат конкретни и правични санкции за виновните.

„Не бараме одмазда, туку правда“, порачаа тие, предупредувајќи дека судницата не смее да се претвори во „Струшки вечери на поезијата“, алудирајќи на одолговлекувањата и неефикасноста во процесот.

Маршот се одржа во време кога веќе се одржаа неколку рочишта од судењето за пожарот, кое и натаму предизвикува силни реакции во јавноста.