Граничниот премин Белановце ќе биде пуштен во употреба до крајот на летово. Сега се изведуваат завршните градежните активности. Овој граничен премин ќе биде многу важен за локалното население, а ќе придонесе и за раст на трговската размена меѓу двете земји. 

Освен македонскиот вицепремиер, Бујар Османи, увид во активностите на терен изврши и косовскиот вицепремиер Енвер Хоџај. 

„Овој објект е буквално заеднички објект на двете држави, и претставуваше посебен административно изведбен предизвик, имајќи предвид дека за неговата реализација мораше да се усогласуваат правилата на двете држави“, изјави Османи. 

Тој вели дека проектот е финансиран преку ИПА програмата за прекугранична соработка помеѓу Република Северна Македонија и Република Косово во износ од 1.200.000 евра, чија изведба е усогласена и со правилата и стандардите кои ги наложува Европската Унија.