Во најголемата установа од овој тип во земјава најпрвин ќе се срушат дел од дотраените објекти со површина од 10.400 метри квадратни, а на нивно место е предвидено да се подигнат три објекти од отвореното одделение за мажи со површина од 5.550 метри квадратни и два објекти од полуотвореното одделение за мажи кои ќе се простираат на 4.650 метри квадратни. Градежна фирма бшто ќе ја реализира реконструкција на постоечките објекти и изградбата на нови објекти во Казнено – поправниот дом  Идризово, бара министерството за правда. Најдобриот понудувач кој ќе го добие тендерот е должен да  изврши и неопходната реконструкција на административната зграда со површина од 1.000 метри квадратни, како и на постоечкиот ресторан со тренинг центар. Во обновата е планирано да се изгради пречистителна станица, да се изведе комплетно нова водоводна, канализациона, електрична, телекомуникациона, топловодна и сообраќајна инфраструктура. Идниот изведувач на градежните работи треба да постави современи безбедносни огради – монтажно армирани бетонски ѕидови и жичани огради. Рокот за завршување на зафатот е 24 месеци по потпишувањето на договорот. Пријавите за учество на огласот треба да се достават до 18 февруари. а на распишаниот тендер можат да учествуваат субјекти кои оствариле годишен обрт на финансиски средства од минимум 25 милиони евра во последните три години.