Народна банка на Република Северна Македонија објави дека е забележан нов раст на кредитирањето на населението, заедно со раст на депозитите. 

Како што е посочено во нивниот извештај, на годишно ниво е забележан раст на вкупните депозити од 9,9 отсто, поради повисоките депозити на двата сектора, со поголем придонес на депозитите на секторот „домаќинства“.

Во истиот период е забележан раст и на вкупните кредити од 12,6 процнети, како резултат на зголеменото кредитирање на двата сектора, коешто е поизразено кај корпоративниот сектор.

Во февруари, вкупните кредити остварија месечно зголемување од 0,2%, во целост поради зголеменото кредитирање на секторот „домаќинства“, при пад на кредитите на корпоративниот сектор. На годишна основа, вкупните кредити забележаа раст од 12,6%, како резултат на зголеменото кредитирање на двата сектора, коешто е поизразено кај корпоративниот сектор. 

- Депозитите на корпоративниот сектор, во февруари, бележат намалување од 1,7% во споредба со претходниот месец, поради намалените депозитни пари и краткорочните депозити во денари, во услови на забележан раст на долгорочните депозити и краткорочните депозити во странска валута. 

Годишниот раст на депозитите на корпоративниот сектор изнесува 9,0% и во најголем дел произлегува од зголемените депозитни пари и краткорочните депозити во странска валута, при дополнителен позитивен придонес и на краткорочните, и на долгорочните депозити во денари, додека долгорочните депозити во странска валута остварија пад - се наведува во соопштението на НБРСМ.

Овој месец, кредитите на корпоративниот сектор остварија месечно намалување од 0,2 отсто, коешто во поголем дел е резултат на пониските кредити во странска валута, при помал пад и на кредитите во денари. Споредено на годишна основа, растот од 14,3% во целост се должи на зголеменото кредитирање во денари, при забележан пад на кредитите во странска валута.

Вкупните депозити на домаќинствата, во февруари, се зголемени за 0,8% на месечно ниво. Притоа, нагорната промена произлегува пред сѐ од растот на депозитните пари и долгорочните депозити во денари, при помал раст и на долгорочните депозити и краткорочните депозити во странска валута, додека краткорочните депозити во денари забележаа намалување. Во споредба со истиот месец минатата година, депозитите на домаќинствата се повисоки за 11,4% како резултат на растот на депозитните пари и долгорочните депозити во денари, при помал раст и на останатите компоненти. ‒ Во февруари, кредитите на домаќинствата остварија месечен и годишен раст од 0,7% и 11,3%, соодветно. Промената кај двете основи се должи на зголеменото кредитирање во денари и во странска валута, со поголем придонес на кредитите во денари.

Анализирано според намената на кредитите одобрени на физичките лица, во февруари, потрошувачките и станбените кредити, како најзастапени категории, бележат месечен раст од 0,8% и 1,1%, соодветно, како и годишен раст од 10,6% и 16,1%, соодветно. Овој месец, автомобилските кредити се зголемени за 1,5% и 3,0%, на месечно и на годишно ниво, соодветно, додека кај кредитите одобрени на кредитните картички е забележано месечно и годишно намалување од 1,6% и 5,1%, соодветно. Во февруари, негативните салда на тековните сметки бележат месечен пад од 0,8%, при годишен раст од 0,8%. Кредитите одобрени врз други основи, во февруари, остварија месечно и годишно намалување од 0,7% и 11,2%, соодветно.

Фото: Фактор