Направени се сите безбедносни проверки за лицата од Авганистан, констатирано е на Советот за безбедност
Направени се сите неопходни безбедносни проверки за лицата кој пристигнаа од Авганистан. На седница на Советот за безбедност денеска се разговараше за прифаќањето на овие лица.
Во Кабинетот на претседателот Стево Пендаровски се одржа 13-та седница на Советот за безбедност. Точки на дневен ред за кои се дискутираше беа лицата од Авганистан прифатени на нашата територија и поставеноста на системот за управување со кризи. Присутните констатираа дека земјава, како членка на НАТО, покажа подготвеност и ги понуди своите капацитети за прифаќање на лицата од Авганистан.
За втората точка на дневниот ред, Советот за безбедност и предложи на Владата, во најкус можен рок да се формира работна група, која ќе ја согледа состојбата со системот за управување со кризи. Имајќи ги предвид неодамнешните состојби со пожарите, работната група треба да предложи конкретни мерки со цел системот за управување со кризи да биде пофункционален и поефикасен.
Покрај членовите на Советот за безбедност, на покана на претседателот Пендаровски на седницата присуствуваа и директорот на Агенцијата за национална безбедност, Виктор Димовски, директорот на Агенцијата за разузнавање, Еролд Муслиу, директорот на Центарот за управување со кризи, Стојанче Ангелов, директорот на Дирекцијата за заштита и спасување, Беким Максути и националниот координатор за имплементација на Националната платформа за намалување на ризици од несреќи и катастрофи, Зоран Петров.
Слично
Поврзани вести
