Опозиционерските пратеници од редовите на Левица бараат намалување на патарините во земајва. Тие укажуваат дека имаме меѓу највисоките патарини во околината, но и пошироко. 

- Македонските граѓани се жртви на државно спонзориран грабеж преку екстремно скапите патарини, кои никако не одговараат на катастрофалниот квалитет на патиштата!

Додека европските земји како Бугарија, Австрија и Швајцарија користат вињета систем што овозможува неограничено движење по прифатлива цена, во Македонија секој изминат километар е дополнителен удар врз џебот на народот! - укажуваат од партијата во соопштението успратено до медиумите. 

За подобра споредба, пратениците ги истакнуваат и дел од цените за патарини кај соседите и кај две добро развиени земји во Европа, но и просечните плати во конкретните земји. 

- Како стоиме во споредба со Европа? Бугарија: 7 дневна вињетка е 8 евра. Австрија: 10 дневна вињетка е 9,9 евра, Швајцарија: годишна вињетка е 42 евра. Македонија: Табановце – Гевгелија (една насока) е над 6 евра. 

Колку тежат овие трошоци во споредба со платите? Швајцарија – просечна плата: 5.500 евра, Австрија – просечна плата: 2.500 евра, Бугарија – просечна плата: 1.000 евра, Македонија – просечна плата: 700 евра - се посочува во соопштението на Левица. 

Од таму посочуваат дека „додека еден Австриец за 10 дневна вињетка плаќа 0,4 отсто од својата месечна плата, Македонецот за само една релација издвојува речиси 1 процент од својата плата, и тоа за руинирани автопати!“.

Потоа потенцираат дека од позиција на власт, ќе воведедат вињета систем. Сметајќи дека актуелната власт не е спремна да го прифати тој предлог сега, пратеничката група на Левица во собранието предложи законски измени за:

- Намалување на цените на патарините за 50 проценти и
- Законска регулација на висината и наплатата на патарините.

- Време е владејачкото мнозинство ДПМНЕ-ЗНАМ-ВРЕДИ да се одважи во интерес на граѓаните и да го прифати овој предлог!
Доста беше организираниот грабеж – народот плаќа, а не добива ништо! - нагласуваат опозиционерите на крајот од нивното соопштение.